चन्द्रागिरि हिल्स रिसोर्टलाई उत्कृष्ट अन्तर्राष्ट्रिय अवार्ड

काठमाडौँ, ३० कात्तिक : काठमाडौँको चन्द्रागिरि हिल्समा अवस्थित चन्द्रागिरि हिल्स रिसोर्टलाई यस वर्षको उत्कृष्ट रिसोर्ट पुरस्कार ‘अन्तर्राष्ट्रिय हस्पिटालिटी एण्ड ट्राभल अवार्ड २०१९’ प्रदान गरिएको छ ।

भारतको नयाँ दिल्लीमा शुक्रबार साँझ आयोजित कार्यक्रममा भारतका संस्कृति तथा पर्यटन राज्यमन्त्री प्रल्हाद सिंह पटेल र पूर्वमन्त्री एवम् राज्यसभाका सांसद विजय गोयलले चन्द्रागिरि हिल्स लिमिटेडका संस्थापक अध्यक्ष तथा सञ्चालक हेमराज ढकाललाई सो पुरस्कार प्रदान गर्नुभएको हो ।

सोही कार्यक्रममा चन्द्रागिरि हिल्स लिमिटेडका महाप्रबन्धक अभिषेक विक्रम शाहलाई यस वर्षको उत्कृष्ट युवा महाप्रबन्धक अवार्ड (योङ्गेष्ट जनरल म्यानेजर अफ द इयर) प्रदान गरिएको थियो ।

भारत पर्यटन विकास निगम, हस्पिटालिटी इन्डिया र जिटीसी इभेन्ट संस्थाले हरेक वर्ष प्रदान गर्ने यो अन्तर्राष्ट्रिय पुरस्कार यस वर्ष उक्त रिसोर्टलाई प्रदान गरिएको चन्द्रागिरि हिल्स लिमिटेडले जनाएको छ ।

ती संस्थाहरुले हरेक वर्ष दक्षिण एसियाली देशका सेवा क्षेत्रमा कार्यरत होटल, रिसोर्ट, हवाई सेवालगायतका विभिन्न पर्यटकीय संस्थाहरुलाई यो अवार्ड प्रदान गर्ने गर्दछन् ।

पुरस्कार प्राप्त गरेपछि खुशी व्यक्त गर्दै चन्द्रागिरि हिल्स लिमिटेडका सञ्चालक ढकालले यो अवार्ड चन्द्रागिरि हिल्सले मात्र नभएर नेपालको सिंगो पर्यटन क्षेत्रले नै प्राप्त गरेको बताउनुभयो ।

उहाँले यसबाट अन्तर्राष्ट्रिय जगतमा नेपालको पर्यटन क्षेत्रको सकारात्मक सन्देश गएको र नेपालमा भारतीय पर्यटकहरुको आगमनमा बृद्धि गर्न तथा विशेषगरी नेपाल भ्रमण वर्ष २०२० सफल बनाउन सहयोग पुग्ने विश्वास उहाँले व्यक्त गर्नुभयो ।

चन्द्रागिरि हिल्समा अवस्थित भालेश्वर मन्दिरका साथै केवलकार, रिसोर्ट लगायतका विविध एकीकृत पर्यटकीय संरचनाहरुका कारण पछिल्लो समय चन्द्रागिरि हिल्समा पुग्ने भारतीय पर्यटकहरुको संख्या बढेको बताउँदै यस अवार्डले आफूलाई थप उत्साहित बनाएको महाप्रबन्धक शाहले बताउनुभयो ।

महाप्रबन्धक शाहका अनुसार त्यहाँ अवस्थित भालेश्वर मन्दिर भारतीय धार्मिक पर्यटकहरुका लागि प्रमुख आस्थाको केन्द्रका रुपमा विकसित भइरहेको छ । नेपालमा पशुपतिनाथको दर्शनका लागि आउने भारतीय पर्यटकहरु प्रायः भालेश्वरमा पनि पुग्ने गरेका उहाँको भनाई छ ।

काठमाडौँको पश्चिमी पर्यटकीय डाँडा चन्द्रागिरिमा विसं २०७३ मा केवलकार सञ्चालनमा आएपछि हाल त्यहाँ होटल, रिसोर्टलगायतका संरचनाहरु निर्मित छन् ।

महाप्रबन्धक शाहका अनुसार हाल चन्द्रागिरिमा प्रत्येक दिन कम्तीमा २ हजार देखि २ हजार ५०० सम्म आन्तरिक तथा विदेशी पर्यटक पुग्ने गरेका छन् ।

चन्द्रागिरिको भव्यता

२५ सय १० मिटर उचाइ । छिनछिनमा बदलिरहने मौसम । वरिपरि हरियाली । तल काठमाडौं उपत्यका छर्लंगै देखिन्छ । आँखैअगाडि आइपुग्छन् हिमाल । चन्द्रागिरि हिल्स रिसोर्टमा पुग्दा काठमाडौंको धुवाँ, धुलो र व्यस्तता सबै भुलिन्छ ।केही दिनअघि नेकपा एकताको गाँठो फुकाउन अध्यक्षद्वय केपी शर्मा ओली र पुष्पकमल दाहाल ‘प्रचण्ड’ चन्द्रागिरि हिल्स रिसोर्ट पुगेका थिए । दुवै अध्यक्षबीच दुई दिनसम्म छलफल चलेको थियो ।

चन्द्रागिरि रिसोर्टको सञ्चालन चन्द्रागिरि हिल्सले गरिरहेको छ । यो एकीकृत परियोजना हो । चन्द्रागिरि हिल्सले केवलकार, मनोरञ्जन पार्क, भ्यु टावर र रेस्टुरेन्ट सञ्चालन गरेको छ । त्यहाँ भालेश्वर महादेवको मन्दिर पनि छ । आइएमई ग्रुपका अध्यक्ष चन्द्र ढकालको अगुवाइमा व्यवसायीको समूहले चन्द्रागिरि परियोजनामा लगानी गरेको हो । रिसोर्टमा सय कोठा छन् । केही कोठामा साजसज्जाको काम भइरहेको छ । ४८ कोठा पूर्ण रूपमा तयार छन् । रिसोर्टमा आठ वटा स्विट रुम हुनेछन् । अहिले रिसोर्ट आंशिक रूपमा सञ्चालनमा छ । रिसोर्टमा बुकिङ पनि आउन थालेको छ । ‘रिसोर्ट तीन महिनाभित्र पूर्ण क्षमतामा सञ्चालनमा आइसक्नेछ,’ रुम डिभिजन म्यानेजर श्याम तण्डुकारले बताए ।

रिसोर्ट झट्ट हेर्दा दरबारजस्तो देखिन्छ । २० रोपनी क्षेत्रफलमा फैलिएको छ । नेपाली मौलिकता झल्काउने आर्किटेक्चर छ । तण्डुकार भन्छन्, ‘कोठाबाटै हिमाल, पहाड र काठमाडौं सहर देख्न सकिन्छ, उठ्नेबित्तिकै हिमाल हाँसेको देख्न पाइन्छ ।’रिसोर्टमा रहेको इन्फिनिटिभ स्विमिङ पुलले आकर्षण थपेको छ । माथि स्विमिङ पुल छ, तल स्पा, साउना, ज्याकुजी, हेल्थ क्लब छन् । एक सय ५० जना अटाउने तीनवटा सभाहल छन् । जहाँ सार्कस्तरीय सभा–सम्मेलन गर्न सकिन्छ । काठमाडौंमा आयोजना हुने सार्कस्तरीय कार्यक्रम चन्द्रागिरिमा गराउने लक्ष्य राखिएको छ ।

रिसोर्टमा सार्क मुलुकका आठजना राष्ट्रध्यक्ष बस्न मिल्ने गरी आठवटा स्विट रुम बनाइएको हो । पाहुना लैजान दुईवटा हेलिप्याड छन् । हाई प्रोफाइल पाहुना र खर्चालु पर्यटकलाई लक्षित गरेर हेलिप्याड बनाइएको हो । रिसोर्टका डिलक्स कोठाको मूल्य १४० र १६० अमेरिकी डलर तोकिएको छ । स्विटको मूल्य महँगो हुनेछ ।रिसोर्टमा १ चैतदेखि पाहुना राख्न थालिएको छ । रिसोर्टका मुख्य ग्राहक कर्पोरेट गेस्ट हुन् । रिसोर्टका म्यानेजर नवीन राउत भन्छन्, ‘रिसोर्टलाई विवाह, व्रतबन्ध, एनिभर्सरी, बर्थडे, सभा–सम्मेलनको उपयुक्त गन्तव्य बनाउने उद्देश्य राखिएको छ ।’ रिसोर्टमा पाँचवटा भवन छन् । भिन्न–भिन्न भवन भएकैले विवाह, भोज गर्दा रिसोर्टका अरू पाहुनालाई कुनै अवरोध हुँदैन ।’

रिसोर्टका भवनलाई हिमालको नाम दिइएको छ । गौरीशंकर, सगरमाथा, मनास्लु, गणेश हिमाल । गौरीशंकर र सगरमाथा भवनमा स्विट रुम हुनेछन् । गणेश हिमाल, मनास्लु भवनमा डिलक्स र एक्जुकेटिभ रुम हुनेछन् । रिसोर्टमा ढुंगेधारा बनाएर पुरानो परिवेश झल्काउन खोजिएको छ । रिसोर्टमा ढुंगा छापेर आकर्षक बनाइएको छ । रिसोर्टमा आउने पाहुनालाई केबलकारको बटम स्टेसन (थानकोट)मै भव्य स्वागत हुनेछ । त्यहाँबाट केबलकार चढेर पाहुना चन्द्रागिरि डाँडोमा आइपुग्नेछन् । केबलकारको टप स्टेसनबाट घुमफिर गर्दै हिँडेर रिसोर्टसम्म पुग्न सकिन्छ । हिँड्न नचाहने पाहुनालाई बोलेरो र हाइसले बोकेर रिसोर्टसम्म पु-याउने व्यवस्था छ । केबलकारबाट झरेपछि रिसोर्टसम्म पुग्न डेढ किलोमिटर दूरी पार गर्नुपर्छ ।

रिसोर्ट पूर्ण क्षमतामा सञ्चालनमा आइसकेपछि भालेश्वर मन्दिरनजिकैबाट रिसोर्टसम्म जिपलाइन सञ्चालन गर्ने योजना छ । रिसोर्टका पाहुनाले जिपलाइन पनि प्रयोग गर्न सक्नेछन् । चन्द्रागिरिबाटै प्याराग्लाइडिङ गराउने योजना छ । रिसोर्टबाट ट्रेकिङ र हाइकिङ जान पनि सकिन्छ । पाहुनाले चाहेको खण्डमा नजिकका गाउँ वा डाँडोतिर हाइकिङ लैजान सकिने म्यानेजर तण्डुकार बताउँछन् ।रिसोर्टबाट भालेश्वर मन्दिरसम्म पैदल जान पनि सकिन्छ । त्यहाँ पुग्न करिब २० मिनेट लाग्छ । यो एकीकृत परियोजनाले नेपाली पर्यटनमा नयाँ आयाम थपिदिएको सञ्चालकहरू बताउँछन् ।

चन्द्रगिरि रिसोर्ट चैत्र १ देखि सञ्चालनमा आउने, केबुलकार र हेलिकप्टर यातायातकाे सुविधा

धुलाम्मे काठमाडौं खाल्डोको व्यस्तताबाट ३० मिनेटको यात्रापछि पुगिन्छ थानकोट प्रहरी चौकी । त्यो चौकीबाट ३ सय मिटर बायाँ लागेपछि आउँछ चन्द्रगिरि केबलकारको बटम स्टेशन । समुन्द्री सतहबाट १४ सय मिटरको उचाईमा रहेको काठमाडौं खाल्डोबाट १५ मिनेट केबलकारको यात्रा गरेपछि पुगिन्छ, चन्द्रागीरी डाँडो जहाँ छ भालेश्वर मन्दिर । यो त्यहि ठाउँ हो जहाँबाट पृथ्वीनारायण शाहले काठमाडौंलाई पहिलो पटक नियालेका थिए र सोही पहिलो नजरबाटै यहाँको राजा हुने सपना देखेका थिए ।

पृथ्वीनारायण शाहले सपना देखेको त्यहि चन्द्रगिरि डाँडोमा बसेर यतिबेला बर्षेनी लाखौं आगन्तुकले सपना देखिरहेका छन् । अब त्यहिँ थपिँदैछ बुटिक रिसोर्ट । र, त्यो बुटिक रिसोर्टको ‘सफ्ट ओपनिङ’ चैत्र १ गते गर्ने तयारीमा चन्द्रागिरि व्यवस्थापन लागेको छ ।
‘एउटा रेष्टुरेन्ट, एउटा बार र केहि फुड आईटमसहित रिसोर्टको सफ्ट ओपनिङ गर्दैछौं’, चन्द्रागिरि हिल्स लिमिटेडका महाप्रबन्धक अभिषेश प्रताप शाहले भने । त्यसका लागि हाल २ वटा ब्लकमा ४८ वटा रुम पूर्णत तयार भएका छन भने एउटा रेष्टुरेन्ट पनि । स्वीट रुम र अर्काे रेष्टुरेन्ट भने केहि समयपछि मात्रै खुला हुनेछ ।

रिसोर्ट सञ्चालनका लागि केहि समय ढिला भैसकेको निष्कर्षसहित चैत १ गतेलाई पहिलो चरणको सेवा आरम्भ गर्ने साइतका रुपमा अघि सारेको पनि शाह बताउँछन् । त्यसको ठिक ३ महिनापछि चन्द्रागिरि हिल्स रिसोर्ट पूर्ण रुपले सञ्चालनमा आउनेछ । चैत, बैशाख र जेठ महिनाको पर्यटकीय सिजनलाई मध्यनजर गरेर ‘ट्रायल ओपनिङ’ पछि सेवामा विस्तार र मूल्य निर्धारण हुनेछ ।

‘बुटिक रिसोर्ट’का रुपमा पाँच तारे होटलको सुविधासहित सञ्चालनमा आउने रिसोर्टले ‘सर्भिसमा कम्प्रोमाइज’ नगर्ने अठोट कसेको छ । शाह भन्छन–‘पछिल्लो समय फाइभ स्टार होटलहरुको सेवा र गुणस्तरमा प्रश्नहरु उठ्ने गरेका छन्, हामी यी दुबै पक्षमा कुनै सम्झौता गर्दैनौं ।’

गत वर्ष ७ लाख स्वदेशी तथा विदेशी पर्यटक केबलकार चढेर चन्द्रागिरि हिल्सको टुप्पोमा पुगेका थिए । त्यसरी केबलकार चढेर चन्द्रागिरि पुग्नेहरुलाई त्यहि बास बसेर प्रकृतिसँग स्पर्श गराउने अवसर दिन भन्दै रिसोर्ट निर्माण गरिएको हो ।

२, ५५१ मिटर उचाईमा रहेको रिसोर्टमा मौसम चिसो र हल्का पानी वर्षासँगै हिउँ पनि पर्छ । यस वर्षको हिउँदमा मात्र छ पटक चन्द्रागिरिमा हिमपात भयो भने निर्माणाधिन रिसाेर्ट घरीघरी हिउँले ढपक्क ढाक्यो । उच्च हिमश्रृंखला, घना वनको आनन्दका साथमा शान्त काठमाडौं उपत्यकाको दृश्यावलोकन समेत रिसोर्टबाट गर्न पाइन्छ ।

जसरी पोखरा, चितवन, अत्रपूर्ण राउण्ड जस्ता पर्यटनका प्याकेज बनिरहेका छन्, त्यसरी नै चन्द्रागि रिलाई पूर्णतः नयाँ गन्तव्यका स्थापित गराउने सोँच बनेको छ ।

 

वैवाहिक समारोह, हनीमुन र कर्पारेट ईभेन्ट हब

पछिल्लो समय नेपालमा विवाह, पार्टी, कर्पाेरेट इभेन्ट, मिटिङहरुका उपयुक्त गन्तव्य खोज्ने क्रम बढेको छ । त्यति मात्रै होइन, हनिमुन र सप्ताहन्त (विकेन्ड) मनाउने चलन पनि बढिरहेको छ । यसैलाई आफ्नो उपयुक्त बजारका रुपमा विस्तार गर्ने योजना रिसोर्टले बनाएको छ ।
‘भारतमा विवाहका लागि राज भिल्ला, ओमर भिल्ला जस्ता ठाउँहरु रोजिन्छन, हामीले पनि चन्द्रागिरि हिल्स रिसोर्टलाई त्यस्तै गन्तव्यका रुपमा स्थापित गराउन चाहेका हौं’, शाहले सुनाए ।

 

कस्तो हुनेछ रिसोर्ट ?

रिसोर्ट कुल १ सय रुम क्षमताको हुनेछ । जसमा स्वीट रुम, डिलसक्स रुम, एक्युटिभ रुम रहनेछन् । त्यसका अलवा नेपाली पन झल्कने र विश्वस्तरीय सेवा उपलब्ध हुने कफि शप र फुड कोर्ट हुनेछ । नेपाली फुड आइटमहरुलाई बिशेष प्राथमिकतामा राखिनेछन् ।

रिसोर्टमा एउटा बार, एउटा बोर्ड रुम र ३ वटा कन्फ्रेन्स हल हुनेछन् । त्यस बाहेक स्वीमिङ पुल, स्पा र हेल्थ क्लब पनि हुनेछन् । त्यस्तै, भिआईपी गेष्टहरुका लागि २ वटा हेलिप्याडको व्यवस्था पनि गरिएको छ । विदेशबाट आउने पर्यटकहरुलाई विमानस्थलबाट सिधै चन्द्रागिरि लैजाने सुविधा समेत प्रदान गरिनेछ । साथै विवाह समारोहमा बेहुला बेहुलीलाई हेलिकप्टरबाट आवतजावतको सुविधा प्रधान गर्ने कम्पनीको योजना छ । अधिकांश मानिस केबुलबार चढेर पुग्नेछन् ।

साथै, रिसोर्टका सबै संरचनाहरु ह्विलचेयरमैत्री छन् । अपाङ्गता भएका यात्रुहरुलाई चन्द्रागिरी केबुलकारदेखि मन्दिरसम्म सबै स्थानमा भ्रमण सक्ने गरि पूर्वाधार निर्माण गरेकोले नेपाल अपांगता महासंघले चन्द्रागिरीलाई अपांग मैत्री भनेर प्रमाणित गरिदिएको छ ।

 

सर्भिस स्ट्याण्डर्ड

चन्द्रागिरिले हाललाई विदेशी चेन होटलसँग साझेदारी गर्ने योजना बनाएको छैन । विदेशी होटल तथा रिसोर्टको चेन लिँदा पनि सर्भिस दिने नेपाली नै भएकाले अब आफ्नै ब्राण्ड स्थापित गर्ने अठोट देखिन्छ । ‘नेपालीपन झल्कने मौलिक रिसोर्ट बनाउन खोजेका छौं । हामीमा अतिथि देवो भवःको संस्कृति नै छ । आत्मियतासहितको नेपाली स्ट्याण्डर्डको सर्भिस दिन्छौं । बेलायत वा अमेरिकाको जस्तो होइन, नेपाली मोडलको चन्द्रागिरिको जस्तो सर्भिस होस भन्ने हाम्रो चाहना हो । त्यसैले हाललाई चेनमा जाने सोच छैन’–शाहले भने ।

 

नेपाली फुड, आत्मिय सेवा

नेपाली फुडलाई वेष्टर्न स्टाइलमा शोकेस गर्ने प्रयास गर्ने शाह बताउँछन् । खाना र सर्भिसलाई फिडब्याक अनुसार थप परिस्कृत गर्दै जाने उनी बताउँछन् । पूर्वाधारमा सम्झौता नगरेकाले सर्भिसमा पनि सम्झौता नगर्ने उनको भनाई छ । त्यसकारण यतिबेला उनको टिम ‘सिग्नेचर डिस’बारे केही अध्ययन गरिरहेको छ ।

नेपालको हस्पिटालिटी विश्व बजारमा राम्रो मानिन्छ । त्यसैलाई आत्मसाथ गर्दै रिसोर्टले शतप्रतिशत जनशक्ति नेपाली नै परिचालन गर्दैछ । केबलकारमा ८० स्थानीयले नै रोजगारी पाएका छन् । नेपालीपनको प्रवद्र्धन गर्ने भनेपछि स्थानीयलाई बिशेष ग्राह्यता दिएको उनले बताए । हाल केबल कारमा २ सय जनाले प्रत्यक्ष रोजगारी पाएका छन् । रिसोर्टले अझै थप रोजगारीको अवसर ल्याउँछ ।

‘वातावरण, पूर्वाधार, सुविधालाई मिल्ने गरि मूल्य निर्धारण हुनेछ । सेवा सुविधामा सम्झौता नगरेपछि मूल्यले खासै अर्थ राख्दैन् । फेरी पनि यसलाई न्यायसंगत नै बनाउने छौं, मूल्यमा गुनासो आउँदैन’–शाहले भने ।

 

४ अर्ब लगानी

२ अर्ब ५० करोड चुक्ता पुँजी भएको कम्पनीले हालसम्म ४ अर्ब लगानी गरेको छ । कम्पनीले बार्षिक साधारण सभाबाट १० प्रतिशत सेयर सर्वसाधारणलाई निष्काशन गर्ने निर्णय गरिसकेको छ ।

साधारण सेयर निष्काशन गर्ने सम्बन्धमा नियमित प्रक्रियागत काम भईरहेको छ । ‘सम्बन्धीत निकायहरुबाट अनुमति जति चाँडो आउँछ त्यति चाँडो नै सार्वजनिक सेयर निष्काशन हुन्छ’ उनले भने ।

 

पाराग्लाईडिङसहितका थप योजना

चन्द्रागिरिमा ७ सय मिटर लामो जिप लाइन निर्माण हुँदैछ । त्यो भन्दा पहिले मिनी जिप लाइन र बालबालिकाका लागि केन्द्रित गरेर छुट्टै परियोजना पनि आउँदैछ । त्यति मात्रै होइन, क्लाम्बिङ बनाउने योजना पनि तय भएको छ । पाराग्लाईडिङ पनि विकास हुँदैछ ।
चन्द्रागिरिबाट उडेको पारागलाईडिङलाई चित्लाङ लैजाने योजना छ । हावाको चाप र भूगोलको बनोटबारे विस्तृत अध्ययन गर्ने, परीक्षण उडान भर्ने तयारी भईरहेको छ ।

 

स्थानीय विकासमा प्रभाव

गत वर्ष ७ लाख भन्दा बढीले चन्द्रागिरी केबलकारको यात्रा गरेका थिए । यसपाली दैनिक २ हजारको हाराहारीमा आगन्तुकहरुको संख्या पुगिरहेको छ । मानिसहरुको आवागमन वृद्धिसँगै स्थानीय तहमा नयाँ बजारको विकास भएको छ । केबलकारको तल्लो स्टेशनमा ९० वटा भन्दा बढी क्याफे, होटल र रेष्टुरेन्ट खुलेका छन् । त्यहाँ सैयौंले रोजगारी पाएका छन् । चन्द्रागिरि नगरपालिका, इन्द्रसरोबार गाउँपालिका र थाहा नगरपालिकालाई छोएको चन्द्रागिरि हिल्सले सो क्षेत्रको पर्यटन प्रवद्र्धनमा पनि नयाँ उत्साह थपिएको छ । चित्लाङलाई पर्यटकीय गन्तव्यका रुपमा चिनाउन चन्द्रागिरि हिल्सले ठूलो योगदान पुर्याएको छ ।

२ वर्ष भन्दा बढी समय भयो केबलकार सञ्चालनमा आएको । ‘३ वटै सरकारसँग राम्रो सम्बन्ध छ । ३ वटा स्थानीय तहसँग हामीले निरन्तर सहकार्य भैरहेको छ । सबैको सहयोगबाट नै यस परियोजनाले सफलता पाईरहेको छ’ शाहले भने ।